السفينة هتغرق!

السفينة كانت عايمة و ريسها معلم ,و كان فى شوية بلطجية محتلين سطوح السفينة, ريس المركب عرف يخرجهم من السفينة , قبل ما يسيبوا السفينة عملوا فى قاع السفينة فتحة  , القبطان خدها بذكاء لحد ما قدر يقرب من الشط , قبل ما يوصلوا الشط راح ريس السفينة سد الفتحة الصغيرة دى بمسمار مقلوب , و مات! . الناس برضة فضلوا قاعدين فى السفينة خافو يوصلوا للشط عوم. فضل المسمار ده يئذى فى الناس طول 30 سنة, لحد ما جبنا شاكوش و شيلنا المسمار . رحنا قلنا للعساكر اللى فى السفينة بما إن الجيش بيقول اتصرف سدوا الفتحة اللى فى السفينة , سيبناهم سنة و نص و معرفوش يسدوا الفتحة لاقيناهم وسعوا الفتحة . رحنا قلناهم اتركنوا على جنب عشان انتم عكتوها على الأخر , قالو ماشى احنا هنسيبها للشيوخ اللى على المركب دول ناس بتوع ربنا و ربنا هيلهمهم الصواب , معظم الركاب قالو ماشى دول ناس ولاد حلال و خلونا نجرب يمكن ربنا ينجينا , لما الشيوخ مسكوا وسعوا الفتحة و المية دخلت السفينة قال اية ! هى دى الطريقة الوحيدة للشرب مع انهم ممكن يمدوا جردل بحبل فى المية و نشرب , لكن هما صمموا و راح شوية من الركاب اتخانقوا مع الركاب التانين , يقوللهم دول ناس ولاد حلال مش ممكن يعملوا حاجة غلط ربنا بيلهمهم الحل , و باقى الركاب يقوللهم ازاى يا ناس ممكن نشرب بطريقة تانية و فضلنا نتخانق لحد ما قاع السفينة ابتدى يتكسر من تدافع الركاب على قاع السفينة .